Rruga nga Brezovica në drejtim të Qendrës së Skijimit është liruar për qarkullimin e automjeteve, mirëpo me vështirësi kalimi.
Kështu ka bërë të ditur për Portalin Dukagjini, zëdhënësi i Policisë së Kosovës për Rajonin e Ferizajt, Kanun Veseli.
Ai ka bërë apel tek qytetarët që të kenë kujdes gjatë lëvizjes.
“Që nga mbrëmë, për shkak të reshjeve të dendura të borës që ka mbuluar atë zonë, është vështirësuar qarkullimi për automjete dhe apelojmë tek shoferët që të bëjnë kujdes gjatë lëvizjes. Shoferët duhet të përshtatin shpejtësinë e lëvizjes së automjeteve në raport me kushtet e rrugës, si dhe të kenë pajisjet dimërore”, ka thënë Veseli.
Gjithashtu ai ka një lutje për shoferët e automjeteve që mos të parkojnë automjetet e tyre në mënyrë të parregullt në skajin e rrugës, sepse e pengojnë qarkullimin e automjeteve, ndërsa pengojnë edhe mjetet borëpastruse të kompanisë për pastrimin e rrugëve.
Më herët, për shkak të reshjeve të shumta të borës, rruga nga Brezovica në drejtim të Qendrës së Skijimit është mbyllur tërësisht për qarkullim.
“Ju njoftojmë se për shkak të reshjeve të dendura të borës që ka mbuluar atë zonë, është vështirësuar qarkullimi i automjeteve, ndërsa është mbyllur tërësisht për qarkullim rruga nga Brezovica në drejtim të Qendrës së Skijimit, deri në pastrimin e rrugës nga kompania për pastrimin e rrugëve. Policia e stacionit të Shtërpcës dhe Njësia Rajonale e Komunikacionit është në Brezovicë dhe po orienton komunikacionin”, theksoi ai.
Më herët, Brezovica.info ka raportuar se gjendja në Brezovicë është e keqe për shkak të reshjeve të shumta të borës, ku edhe janë bërë disa rekomandime që të shmanget vizita në këtë qendër skijimi.
Mbyllet për qarkullim rruga nga Brezovica në drejtim të qendrës së skijimit