Në përvjetorin e 74-të të NATO-s, kryetari i AAK-së, Ramush Haradinaj, ka thënë se beson shumë se Kosova e meriton të anëtarësohet në këtë organizatë.
Haradinaj u shpreh se Kosova synon të bëhet pjesë e barabartë e aleancës së shteteve të NATO-s.
“Sot, si Republikë e Kosovës, ne jemi kontribuues me Ushtrinë tonë, në misione ndërkombëtare paqeruajtëse të kësaj Aleance. Si popull i lirë me orientim të natyrshëm euro-atlantik, ne synojmë që të jemi pjesë e barabartë e aleancës së shteteve të NATO-s, udhëhequr nga ShBA-të. Besoj shumë që Kosova e ka vendin në NATO, për të qenë krah miqve tanë për ta ndihmuar paqen dhe lirinë”, shkroi Haradinaj në Facebook.
Haradinaj e kujtoi kohën kur NATO-ja i doli në ndihmë Kosovës, duke e ndalur gjenocidin serb ndaj shqiptarëve.
“Fuqinë e drejtësisë së kësaj Aleance të madhe, e përjetoi edhe populli i Kosovës, në momentet më vendimtare të historisë së tij për çlirim, për çka jemi mirënjohës përgjithmonë”, tha Haradinaj.
NATO u krijua më 4 prill 1949, me nënshkrimin e Traktatit të Atlantikut të Veriut, i cili ishte krijuar për të ofruar mbrojtje kolektive kundër Bashkimit Sovjetik gjatë Luftës së Ftohtë.
Qëllimi kryesor i NATO-s është të sigurojë mbrojtje dhe siguri kolektive për shtetet e saj anëtare. Kjo do të thotë se nëse një shtet anëtar sulmohet, konsiderohet si sulm ndaj të gjitha shteteve anëtare dhe ata do të përgjigjen së bashku për të mbrojtur anëtarin e sulmuar.
NATO gjithashtu promovon bashkëpunimin politik dhe ushtarak midis anëtarëve të saj dhe ka qenë e përfshirë në një numër misionesh dhe operacionesh në mbarë botën. Për shembull, forcat e NATO-s u përfshinë në stabilizimin e Ballkanit në vitet 1990 dhe janë përfshirë në luftën në Afganistan që nga viti 2001.