Kryetari i AAK-së, Ramush Haradinaj, ia ka drejtuar tre propozime Qeverisë së Kosovës, në lidhje me një marrëveshje të mundshme me Serbinë.
Propozimi numër një i Haradinajt ka të bëjë me komunikimin e Qeverisë së Kosovës, me ambasadorët e vendeve të Quint-it dhe me serbët e veriut.
“Një komunikim intenziv mes institucioneve të Kosovës dhe ambasadorët e Quintit, me serbët e Kosovës, posaçërisht me serbët e Veriut, me të gjitha nivelet e mundshme, këto ditë deri me 1 shtator”, thuhet në shkrimin e Haradinajt.
Propozimi i dytë, është që palët të përmbahen pas takimit të 18 gushtit dhe të mos përdoret “retorikë luftënxitëse”.
Dhe propozimi i tretë dhe i fundit, është që udhëheqësit e Bashkimit Evropian, ta dorëzojnë agjendën e dialogut Kosovë-Serbi, presidentit të Shteteve të Bashkuara të Amerikës, Joe Biden, në mënyrë që ai t’i ftojë liderët e Kosovës dhe Serbisë, për marrëveshjen finale me njohje reciproke.
“Udhëheqësit e BE-së, të ja dorëzojnë agjendën e dialogut Kosovë-Serbi, presidentit Biden, në mënyrë që t’i ftojë liderët e dy vendeve për marrëveshjen finale për njohje reciproke sa më parë”, thuhet në reagimin e Haradinajt.
Në fund, Haradinaj e ka ripërsëritut kërkesën e tij për miratimin e ligjit të pagave si dhe për beneficionet e policisë së Kosvoës.