Kryetari i Aleancës për Ardhmërinë e Kosovës (AAK), Ramush Haradinaj ka thënë se Brigada 133 “Adrian Krasniqi” e Zonës Operative të Dukagjinit, që nga themelimi i saj, ishte krah i fortë i luftës për liri.
Përmes një postimi në Facebook, Haradinaj ka thënë se me betejat e tyre, kjo brigadë ka nderuar emrin e heroit Adrian Krasniqi, Ushtrinë Çlirimtare të Kosovës dhe mbarë shqiptarët.
Ai ka kujtuar betejat e prillit, kur luftëtarët e kësaj brigade, me heroizmin e tyre, i treguan armikut se pranvera e ardhshme do ta gjejë Kosovën të lirë.
“Sot, gjithashtu në nderim të martirëve dhe heronjve në Lubizhdë të Hasit, kujtojmë me prioritet sakrificën e tyre madhore për atdheun dhe nderojmë kontributin e rajonit të Hasit për liri”, ka shkruar Haradinaj.
Kreu i AAK-së ka thënë se gjatë gjithë përpjekeve shekullore, ky rajon ishte aty ku shkruhej historia.