Kryetari i Aleancës për Ardhmërinë e Kosovës (AAK), Ramush Haradinaj, pas takimit me emisarin amerikan, Gabriel Escobar i shoqëruar nga ambasadori amerikan, Jeff Hovenier ka thënë se janë mjaft të angazhuar dhe të fokusuar për zhvillimet në veri të vendit, duke thënë se kërkesa e tyre është që të ulen tensionet, të hiqen barrikadat dhe të kthehet normaliteti në atë pjesë të vendit.
Sipas tij, ky angazhim i Shteteve të Bashkuara të Amerikës (ShBA) do ta “shpëtojë situatën dhe do të na kthejë te marrëveshja finale për njohje Kosovë-Serbi”.
“Sapo përfundova takimin me z. Escobar dhe ambasadorin Hovenier. Mund t’ju them se janë mjaft të fokusuar në zhvillimet në vend, posaçërisht në Veri, me kërkesën eksplicite që të ulen tensionet, të hiqen barrikadat dhe të kthehet normaliteti në atë pjesë të vendit”, ka shkruar Haradinaj në Facebook.
Ndër të tjera, ai ka thënë se ka shprehur falënderim ndaj ShBA-së për ndihmën që po i jep Kosovës.