I pari i Aleancës për Ardhmërinë e Kosovës, Ramush Haradinaj, në 7-vjetorin e formimit të Ushtrisë së Kosovës, ka kujtuar një nga vendimet më të rëndësishme shtetformuese të pasluftës.
Ai vlerëson se krijimi i Ushtrisë ishte një akt historik i marrë nga Qeveria Haradinaj me bekimin e Shteteve të Bashkuara të Amerikës, njofton Dukagjini.
“Erdhëm në paqe, në rresht me ushtritë e paqes. Shtatë vite guxim, shtatë vite krenari, shtatë vite Ushtria e Kosovës krah nesh”, ka shkruar Haradinaj.
Haradinaj ka nënvizuar se Ushtria e Kosovës lindi nga sakrifica e madhe e luftës çlirimtare, nga gjaku i derdhur i dëshmorëve dhe nga amaneti i atyre që nuk u kthyen kurrë, por që i lanë Kosovës lirinë dhe përgjegjësinë për ta mbrojtur atë.