Kryetari i Aleancës për Ardhmërinë e Kosovës, Ramush Haradinaj, ka përkujtuar 579-vjetorin e ”Besëlidhjes së Lezhës”.
Me anë të një postimi në llogarinë e tij në Facebook, Haradinaj ka thënë se “nëpër kohë, shqiptarët ekzistonin, por nuk ishin vetvetja, ishin pjesë – pjesë, por nuk ishin një”.
“Gjithë kjo histori e madhe që u ka mbijetuar shekujve e ka pikënisjen, dhe ai është momenti kur jemi bërë një, te Kuvendi i Lezhës dhe atyre prijësve te mençur që ditën ta bashkonin kombin në kohë të vështira, për një përpjekje më të madhe. Nëpërmjet vendimeve të ndërmarra në këtë Kuvend, u vendosën bazat e ndërgjegjes kombëtare. Edhe sot, në përvjetorin e 579-të, është shumë e rëndësishme t’i qëndrojmë mesazhit të bashkimit që e dha Gjergj Kastrioti – Skenderbeu, veprës, doktrinës dhe trashëgimisë së tij”, shkroi ai.
“Besëlidhja e Lezhës”, e njohur edhe si “Lidhja Shqiptare e Lezhës”, “Kuvendi i Lezhës”, “Liga e Princave Shqiptarë”, është një prej ngjarjeve më të rëndësishme të historisë së popullit shqiptar.
Ajo u mbajt më dy mars të vitit 1444, në katedralen e Shën Nikollës në qytetin e Lezhës, aty ku edhe gjendet memoriali i Gjergj Kastriot Skënderbeut.
Qëllimet e kuvendit ishin bashkimi i sa më shumë fisnikëve e principatave nga tokat, që më parë, ishin të njohura si toka të perandorisë së Bizantit, si dhe rimëkëmbja e Mbretërisë së Arbrit.
Ky kuvend mbështetej edhe nga Papa, pasi me këtë do të ngadalësohej depërtimi i Perandorisë Osmane në Ballkan.
Krijimi i një Besëlidhjeje mbarëshqiptare ishte bërë mbi principe të gjuhës, dokeve dhe traditave të veçanta, në krye me Skënderbeun.
Besëlidhja, formimin e një ushtrie të përbashkët të komanduar nga Skënderbeu si Kapiten i përgjithshëm dhe krijimi i një arke të përbashkët për t’i përballuar shpenzimet e luftës.
“Lidhja e Lezhës” në historinë shqiptare shënon një hap përpara bashkimit të tokave shqiptare në një shtet të përqendruar, me të cilin, arrin pikën kulmore tradita shtetërore në mesjetën shqiptare.