Koncerti i parë i muajit mars nga Filharmonia e Kosovës do të titullohet “Harpa dhe Harqet” dhe do të jetë në drejtimin e dirigjentit Edon Ramadani dhe harpistes e mirënjohur turke Şirin Pancaroğlu.
Dirigjenti i njohur kosovar, Edon Ramadani ka shpalosur detaje më të hollësishme rreth këtij koncerti për emisionin “Reload” në Televizionin Dukagjini.
Orkestra Harkore e Filharmonisë së Kosovës nën dirigjimin e Edon Ramadanit do të mbahet më 2 mars 2024 (E shtunë) prej orës 20:00 në Atelienë e Pallatit të Rinisë dhe Sportit në Prishtinë.
Sipas Ramadanit, veçantia e këtij koncerti është musafirja e njohur turke, Şirin Pancaroğlu.
Agjenda e Koncertit do të jetë si vijon “Pjesa e parë e programit do të hapet me një program unik duke përfshirë veprën “Sinfonietta” për orkestër harqesh nga kompozitori kosovar Drinor Zymberi, “Valle për harpë dhe orkestër” nga kompozitori impresionist francez Claude Debussy dhe “Suita e Holberg-ut Op. 40” nga Edvard Grieg”, theksoi Ramadani.
Në këtë mbrëmje do të interpretohet edhe një vepër e harpistes Şirin Pancaroğlu e cila përveç instrumentit të harpës është një avokuese e literaturës së shkruar për instrumentin e harpës dhe çeng-ut (harpës turke).