Nënkryetari i Lidhjes Demokratike të Kosovës(LDK), Lutfi Haziri, ka thënë se deri më tani asnjë marrëveshje e re nuk është arritur në takimet e kryeministrit të Kosovës, Albin kurti dhe presidentit të Serbisë, Aleksandër Vuçiq.
Haziri përmes një postimi në Facebook ka shkruar se në këto takime është biseduar dhe dakorduar lidhur me metodat e implementimit të marrëveshjeve që janë arritur nga ish-kryeministrat e Kosovës.
“Ende nuk e kemi parë Kurtin në veprim për të zgjidhur një çështje të vetme në agjendën e cila pritet të shtjerret së bashku me ndërmjetësin ndërkombëtar, që në këtë rast është BE dhe Lajcak në emër të përfaqësuesit më të lartë të BE-së dhe lehtësimit të vjen nga ShBA-të”, ka shkruar tutje Haziri.
Ai ka thënë se në takimin e nesërm në mes të Kurtit dhe Vuçiq, prioritet duhet të jetë negocimi sa më i shpejtë për zgjidhjen e çështjeve që janë përpara në dialog për një marrëveshje gjithëpërfshirëse me njohje reciproke në qendër.
“Natyrisht, me marrëveshje gjithëpërfshirëse e cila përfundon me njohje reciproke dhe i obligon të dyja palët që ta zbatojnë dhe mbi të gjitha, me këmbëngulësi dhe me vullnet politik duhet të insistojmë që kjo të përfundojë sa më parë sepse status-quo është armiku më i madh i Kosovës, e cila sjell tensione”, ka thënë ndër të tjera Haziri.
Sipas tij, në këtë rast, kapaciteti i gjetjes së zgjidhjeve tregohet jo nëpërmjet policisë, por nëpërmjet dialogut.