Ish-kryeministri i Kosovës, Avdullah Hoti, tash deputet i Lidhjes Demokratike të Kosovës, e ka kritikuar Qeverinë e Kosovës, për qasjen e tyre në dialogun Kosovë-Serbi.
Hoti ka shkruar në Facebook, se përfaqësues të qeverisë, kanë shkuar në Bruksel për t’u takuar me drejtorin e ashtuquajturës “Zyra për Kosovë”, në Qeverinë e Serbisë, Petar Petkoviq.
Sipas tij, Qeveria e Kosovës, duhet ta dëgjoj kërkesën e ShBA-së dhe ta shtyjë zbatimin e vendimit për targa.
“SHBA-ja, aleati ynë kryesor – i kërkon Qeverisë së Kosovës të shtyj zbatimin e vendimit për targat, e këta shkojnë e takohen me Petkoviqin në Bruksel!!! Vendimi për targat është marrë nga Qeveria. Çfarë ka për tu negociuar?! Fatkeqësisht, këta qeveritarë na kanë futur në qorrsokak sa i përket dialogut, e na kanë dëmtuar partneritetin me aleatët. Fundi nuk mund të jetë i mirë”, ka shkruar Hoti.
Ndryshe, takimi midis zëvendëskryeministrit të Kosovës, Besnik Bislimi, dhe përfaqësuesit të Bashkimit Evropian për dialogun, Miroslav lajçak, tashmë ka nisur.
Kështu mëson Portali Dukagjini për këtë takim i cili vjen pas kërkesës së shtyrjes së vendimit të Qeverisë së Kosovës për çështjen e targave.
Zëvendëskryeministri i Kosovës, Besnik Bislimi, bashkë me ekipin e tij, të hënën e 14 nëntorit ka udhëtuar drejt Brukselit, ku do të zhvillojë bisedime në kuadër të dialogut Kosovë-Serbi.