Analisti, Ylli Hoxha, ka thënë se kryeministri i Kosovës, Albin Kurti, duhet ta publikojë draft-statutin e Asociacionit të Komunave me Shumicë serbe.
Sipas tij, natyra e Asociacionit po shndërrohet në një institucion serb brenda Kosovës.
“Kurti duhet ta publikojë statutin. 2013-ta në asnjë pikë si marrëveshje nuk e paraqet Asociacionin si me autoritet, autorizim për mbrojtjen e pakicës serbe, e paraqet si përfaqësues të të drejtave që ia ka deleguar Kushtetuta komunave të caktuar dhe menaxhimin më të mirë të tyre. Në 2015-tën thotë se Asociacioni promovon interesat e komunave, e tash Asociacioni do të angazhohet në promovimin dhe mbrojtjen e të drejtave të interesave të komunitetit serb të Kosovës”, ka thënë Hoxha në emisionin “Debat Plus”, në RTV Dukagjini.
“Natyra e Asociacionit po shndërrohet në një institucion serb brenda një Kosove multietnike. Shpresoj që ky draft të jetë gabim, shpresoj që ky draft nuk është i vërtetë, dhe nëse është i vërtetë shpresoj që Kurti ende është në fazën e taktizimit e nuk është në fazën e adoptimit të mendimit që ky statut ndoshta edhe mund të aplikohet”, shtoi ai.