Kryetari i Vushtrrisë dhe kandidat për një mandat të ri nga PDK-ja, Ferit Idrizi, ka raportuar se është kërcënuar nga kundërkandidati i tij në balotazh, Sylejman Meholli i LVV-së.
Policia e Kosovës ka konfirmuar rastin duke thënë se “sot rreth orës 17:30 është pranuar informata për një kanosje në rrugën ‘Xhorxh Bush’ në Prishtinë. Pas marrjes së informatës, policia ka shkuar në vendngjarje dhe aktualisht po punon për zbardhjen e rrethanave dhe motiveve të ngjarjes”, thuhet në përgjigjen e Policisë.
Idrizi ka thënë se kërcënimi ndodhi pas një debati që ai zhvilloi me Mehollin në Kallxo.com.
Ai dhe dëshmitarët kanë dhënë dëshmi në stacionin e policisë në Prishtinë.
“Bashkë me dëshmitarët tjerë, sapo kemi dhënë dëshminë në stacionin e policisë në Prishtinë. Rasti është në trajtim nga institucionet përkatëse. E dënoj këtë akt dhe ju kërkoj ndjesë për shqetësimin. Gara për Vushtrrinë duhet të mbetet garë idesh dhe projektesh, jo kërcënimesh. Unë do të vazhdoj të përfaqësoj secilin qytetar me përgjegjësi dhe dinjitet”, ka shkruar Idrizi.