Të hënën e tre tetorit, Agjencia e Kosovës për Akreditim (AKA) është bërë anëtare e asocuar e ENQA-s.
E këtë e ka quajtur si të arritur mjaft të madhe profesoresha, Hasnije Ilazi, njëherësh kryetare e Këshillit Shtetëror të Cilësisë (KShC).
Ajo ka thënë se institucionet e Kosovës duhet të jenë të barabarta me ato evropiane, pasi përfshirja në këtë rrjet ndërkombëtar do të arrijë të bëjë ngritjen e cilësisë në arsim.
“Jo vetëm pranimi praktik i diplomave, por është mundësia që të ketë shkëmbime të cilësisë”, ka thënë Ilazi.
Siç thotë ajo, përpjekja dhe puna që është bërë deri më tash ka treguar që rekomandimet nga ENQA janë ngritur në nivel më të lartë sa i përket cilësisë.
Këtë hap e ka quajtur të rëndësishëm edhe Elton Bahtiri, prorektor për zhvillim dhe cilësi në Universitetin e Prishtinës.
Ky akt, siç thotë ai, nuk është i rëndësishëm vetëm për agjencinë e akreditimit, por është një e arritur mjaft e madhe për tërë sektorin e arsimit.
Ai ka thënë se agjencia e akreditimit edhe institucionet e arsimit të lartë kanë qenë të angazhuara të rrisin standardet e cilësisë, në mënyrë që ky anëtarësim të jetë i mundur.
“Janë pranuar diplomat, nuk kemi pasur statutin e anëtarit të asociuar”, ka thënë Bahtiri.
Të martën e katër tetorit, Agjencia e Kosovës për Akreditim dhe Këshilli Shtetëror për Cilësi kanë zhvilluar një takim (i cili është i për vjetshëm) me drejtues të institucioneve publike dhe private të Arsimit të Lartë, ku kanë diskutuar lidhur me obligimet dhe kriteret që duhet të zbatojnë në raport me AKA-në.
Në ndërkohë, për këtë, ministrja e Arsimit, Arbërie Nagavci ka thënë se është një lajm shumë i mirë dhe hap shumë me rëndësi.
Nagavci ka kritikuar qeveritë e kaluara duke thënë se kishte ndërhyrje politike prandaj nuk ndodhi një akreditim i tillë.
“Tri vjet më parë, për shkak të ndërhyrjeve politike të qeverisë PAN, Kosova ishte përjashtuar nga ENQA, tani tri vjet pas po ecim para edhe në këtë drejtim”, ka shkruar Nagavci.