Për të tretën herë, Gjykata e Lartë nuk ia hap derën e burgut Ilir Metës
Ish-presidenti i Republikës së Shqipërisë, Ilir Meta, dështoi për të tretën herë të bindë Gjykatën e Lartë për ta nxjerrë nga qelitë e paraburgimit. Kjo gjykatë vendosi të mos pranojë rekursin e bërë nga Meta, kundër vendimeve të shkallëve më të ulëta, duke lënë të pandryshuar masën “arrest në burg”, të konfirmuar ndaj tij nga Apeli i Posaçëm më 17 korrik.
Shqyrtimi gjyqësor në Gjykatën e Lartë u bë në Dhomë Këshillimi, mbi bazën e dokumenteve pa praninë e palëve. Më herët, Shkalla e Parë dhe Apeli i Posaçëm në vendimet përkatëse për të mos i dhënë liri Ilir Metës kanë arsyetuar se pozita e tij aktuale procedurale, i pandehur, justifikon qëndrimin e tij në qeli dhe në liri, për shkak të pushtetit dhe pozicioneve shtetërore dhe politike mund të ndikojë tek dëshmitarët.
Nga tetori i vitit të shkuar, Ilir Meta, nuk ka ndalur përpjekjet për zbutje të masës së sigurisë, por pa pasur sukses. Vetëm Gjykata e Lartë përveç së enjtes ka refuzuar rekurset e tij mbi masën edhe në shkurt dhe korrik 2025.
Dosja penale ndaj tij dhe të bashkë-pandehurve, ku Meta akuzohet për “korrupsion”, “pastrim të parave” dhe “fshehje e mosdeklarim të pasurisë”, ndodhet në fazën e shqyrtimit paraprak në Gjykatën e Posaçme./A2CNN