Uran Ismaili, anëtar i Partisë Demokratike të Kosovës (PDK), ka shprehur shqetësimin e tij në lidhje me audio-incizimet e publikuara ku shefja e Grupit Parlamentar të Vetëvendosjes, Mimoza Kusari-Lila, bisedon me përfaqësuesin e Listës Serbe, Sllavko Simiq.
Në bisedë, Kusari-Lila kishte pohuar se kishte komunikuar me Milan Radojiçiqin, person në kërkim nga Policia.
Ismaili ka kërkuar që Prokuroria ta hetojë këtë çështje dhe të përcaktojë nëse veprimet e Kusari-Lilës mund të konsiderohen si vepër penale.
“Me çështjen e Radojiçiqit shkarkimi ka qenë më e pakta, dhe unë pajtohem që duhet të ketë hetim”, ka thënë Ismaili në Debat Plus.
Ai ka shtuar se nëse do të ishte ai që ka biseduar me Radojiçiqin ministrja e Drejtësisë Albulena Haxhiu, do të kërkonte hetim ndaj tij.
“Po të isha unë ai që kishte biseduar me Radojiçiqin, i cili është në kërkim nga Policia, mendoj që ministrja e Drejtësisë do të reagonte ndaj meje dhe jam 100 për qind i sigurt që do të kërkonte hetim”, ka deklaruar Ismaili.
Ai gjithashtu ka theksuar se një situatë e tillë do të shkaktonte reagim edhe nga kryeministri i Kosovës, Albin Kurti, i cili sipas tij, do të ishte thënë “shikoj sesi koordinohen me serbët”.
Ismaili ka vënë në dyshim deklaratat e Qeverisë së udhëhequr nga Lëvizja Vetëvendosje, duke thënë se nuk mund të quhet “Qeveri liberale” kur kundërshton lirinë e medias, tenton të vendosë militantë nëpër vend, dhe shtyn gazetarët drejt heshtjes.
“Nuk mundesh me quajt vetën Qeveri liberale, kur ke akuza të njëpasnjëshme për sulme ndaj mediave, për tentim të vendosjes së militantëve gjithandej dhe për tentim të heshtjes së gazetarëve dhe me quajt vetën Qeveri liberale”, është shprehur ai.
Ai gjithashtu ka shprehur mospajtimin e tij me mënyrën e trajtimit të rastit të bisedimit të Kusari – Lilës me Radojiçiqin, ku siç ka thënë ai akoma asnjë masë nuk është ndërmarrë për shkarkimin e saj.