Para vizitës së kryeministrit izraelit, Benjamin Netanjahu në Uashington këtë javë, Izraeli ka marrë një sërë masash për të zgjeruar kontrollin e tij mbi Bregun Perëndimor të pushtuar.
Të dielën, kabineti i sigurisë izraelit miratoi masa që i japin shtetit fuqira të zgjeruara zbatimi dhe mundësinë për të blerë toka për zgjerimin e vendbanimeve hebraike.
Ministri i Financave, Bezalel Smotrich, e përshkroi këtë si një ndryshim “thelbësor të realitetit ligjor dhe civil” në Bregun Perëndimor, territori që sipas Kombeve të Bashkuara është i rezervuar për një shtet të ardhshëm palestinez.
Masat përfshijnë zgjerimin e kontrollit izraelit në Zonat A dhe B të Bregut Perëndimor, të cilat sipas Marrëveshjeve të Oslo-s janë nën kontroll të sigurisë palestineze dhe përbëjnë rreth 40% të territorit, raporton CNN.
Izraeli gjithashtu do të rivendosë Komitetin për Blerjen e Tokave, që i lejon shtetit të blejë toka në Bregun Perëndimor për zgjerimin e vendbanimeve. Një tjetër masë i jep administratës civile dhe pakicës së vogël hebraike në qytetin e Hebronit fuqira ndërtimi dhe menaxhimi, duke lejuar zgjerimin e vendbanimit pa konsultim me komunën palestineze të Hebronit.
Kabineti miratoi gjithashtu masa që do të lehtësojnë blerjen e tokave nga kolonët hebrenj në Bregun Perëndimor, duke synuar zgjerimin e aktivitetit të vendbanimeve dhe konsolidimin e pranisë së popullsisë hebraike.
Smotrich, i cili ka pohuar hapur se synon të eliminojë idenë e një shteti palestinez, deklaroi se “Po normalizojmë jetën në territore, duke hequr barrierat burokratike, duke luftuar për tokën dhe duke thelluar praninë tonë në gjithë Tokën e Izraelit.”
“Do të vazhdojmë të shuajmë idenë e shtetit palestinez”, shtoi ai.
Autoriteti Palestinez (PA) e dënoi këtë vendim, duke e cilësuar si “vazhdim i luftës gjithëpërfshirëse të qeverisë së pushtimit kundër popullit palestinez dhe një përshkallëzim i paprecedentë që synon prani dhe të drejta historike të palestinezëve në të gjitha tokat e tyre.”
Zëdhënësi i Hamasit, Hazem Qassem, tha se vendimet e Izraelit “konfirmojnë programin kolonial që synon të gllabërojë të gjitha tokat palestineze dhe të zhvendosë popullsinë autoktone.”
Izraeli pushtoi Bregun Perëndimor nga Jordania në luftën e vitit 1967 dhe filloi vendosjen e vendbanimeve hebraike, të cilat konsiderohen të paligjshme sipas ligjit ndërkombëtar dhe nga shumica e komunitetit ndërkombëtar. Kombet e Bashkuara e konsiderojnë Bregun Perëndimor dhe Jeruzalemin Lindor si territore të pushtuara, të cilat palestinezët i kërkojnë për një shtet të ardhshëm.