Është ndër institucionet e pakta evropiane që tash e katër vjet bën thirrje për heqjen e vizave ndaj kosovarëve.
Komisioni Evropian është i bindur se Kosova ka plotësuar kriteret, mirëpo kështu vazhdojnë të mos mendojnë disa shtete të mëdha brenda BE-së.
Por, Komisioni Evropian ka deklaruar për RTV Dukagjini se është i gatshëm ndërmjetësojë mes këtyre shteteve dhe Kosovës për të eliminuar paqartësitë.
“Komisioni është i gatshëm të mbështesë punën dhe bashkëpunimin e mëtejshëm ndërmjet shteteve anëtare dhe autoriteteve të Kosovës për të adresuar këto çështje”.
KE-ja ka treguar dilemat që shtetet si Franca e Holanda kanë ndaj liberalizimit të vizave.
“Ne pranojmë se disa shtete anëtare mbajnë shqetësime në pritje për çështje të tilla si lufta kundër korrupsionit, pretendimet e rreme për azil dhe siguria e dokumenteve të mbuluara nga udhërrëfyesi”.
Kur përmend udhërrëfyesin, Komisioni ka fjalën për atë të vitit 2012, kriteret e të cilit KE-ja thotë se janë plotësuar nga Kosova.
Komisioni Evropian thotë se brenda institucionit nuk ka diskutime për një udhërrëfyes të ri me kritere shtesë ndaj Kosovës.
Sqarimi i KE-së vjen pas deklaratës të komisionarit të BE-së, Oliver Varhelyi, i cili tha se Komisioni është i gatshëm që, bashkë me vendet anëtare, të përpilojë një udhërrëfyes shtesë për të adresuar disa shqetësime specifike.
Këto shqetësimet dhe dilemat për vizat do ta dërgojnë në Bruksel ministrin e Brendshëm të Kosovës, Xhelal Sveçla.
Kabineti i tij i ka konfirmuar RTV Dukagjinit se Sveçla udhëton gjatë së mërkurës, për ta takuar Komisioneren e BE-së për Çështje të Brendshme, Ylva Johanson.
Mirëpo, MPB-ja nuk ka dhënë detaje të tjera.
Përveç Komisionit, thirrje për liberalizimin e Kosovës ka bërë edhe Parlamenti Evropian.
Çelësin e vizave vazhdon ta mbajë Këshilli i ministrave të vendeve anëtare të BE-së.