Komisioni Evropian po harton një propozim të ri për të rivendosur tarifa ndaj naftës ruse që vazhdon të hyjë në tregun e përbashkët përmes Hungarisë dhe Sllovakisë, pas presionit të presidentit amerikan Donald Trump për shkëputjen e plotë të lidhjeve energjetike me Moskën.
Tarifat e reja synojnë të rrisin koston për këto dy shtete dhe t’i shtyjnë ato të kërkojnë burime alternative furnizimi.
“Në momentin e duhur ne do të prezantojmë planin që kemi ndërmend”, tha zëdhënësi i Komisionit, Olof Gill, duke sqaruar se kjo nismë është e ndarë nga paketa e 19-të e sanksioneve që po diskutohet aktualisht.
BE kishte vendosur në vitin 2022 një ndalim tërësor për derivatet e naftës ruse si përgjigje ndaj pushtimit të Ukrainës, hap i konsideruar vendimtar në reduktimin e varësisë energjetike nga Moska. Megjithatë, Hungaria dhe Sllovakia siguruan përjashtim për të vijuar blerjet përmes naftësjellësit Druzhba, duke importuar secila rreth 100 mijë fuçi në ditë naftë urale – një karburant i rëndë që rafineritë e tyre janë të ndërtuara për ta procesuar.
Edhe pse përjashtimi pritej të ishte i përkohshëm, ai nuk është rishikuar deri më tani. Por, Trump ka kërkuar publikisht nga vendet evropiane që të ndalin menjëherë blerjen e naftës ruse, me arsyetimin se vetëm kështu Kremlini do të detyrohet të ndalë luftën në Ukrainë.