Kryetari i Partisë Fjala, Gëzim Kelmendi, në emisionin “Debat Plus” në RTV Dukagjini ka folur për kryeministrin e Kosovës, Albin Kurtin, të cilin e ka akuzuar se i ka mashtruar besimtarët myslimanë dhe i ka përdorur vetëm për vota.
“Albin është vazhdimësi e politikës së pasluftës. Ka ardhur në pushtet me premtimin e luftimit të islamfobisë dhe [ lejimin e] shkollimit të vajzave me mbulesë”, ka thënë Kelmendi.
Sipas tij, në njërën nga komunat që qeveris Lëvizja Vetëvendosje është larguar një vajzë me mbulesë nga shkolla.
“Albini nuk e ka ndryshuar Udhëzimin [Udhëzimin Administrativ të Ministrisë së Arsimit që ndalon bartjen e mbulesë në Shkolla Publike] që ndryshohet brenda natës”, ka thënë Kelmendi, duke shtuar se Kurti as “minimumin e premtimeve nuk e ka realizuar në raport me besimtarët myslimanë”.
Kelmendi ka thënë se “Kurti është vazhdimësi e politikanëve që nga paslufta që besimtarët myslimanë i kanë shfrytëzuar vetëm për vota”.
“Albin Kurti sot kryeministër e përfaqëson një shtet me 97 për qind myslimanë, në ditën e xhuma [e premte] të ramazanit, në Gllogjan pi raki. Çfarë kryeministri është ky që nuk i respekton ndjenjat e myslimanëve të Kosovës”, ka përfunduar Kelmendi.