Deputetja nga radhët e Lidhjes Demokratike të Kosovës (LDK), Doarsa Kica-Xhelili, i ka reaguar ministres së Drejtësisë, Albulena Haxhiu, duke thënë se ajo nuk ka të drejtë ta komentojë përmbajtjen e vendimeve gjyqësore, e aq më pak, sipas saj, të Gjykatës Kushtetuese kur i rrëzon vendimet e Haxhiut.
Kica – Xhelili ka thënë se as Gjykata Kushtetuese e as demokracia në Kosovë, nuk janë krijuar falë ministres Haxhiu.
“Por, ajo është ministre e kësaj demokracie parlamentare dhe duhet OSE ta respektojë këtë demokraci, ose të zhvendoset në një shtet autokratik që përkon me ideologjinë e saj. Dhe kur ia kujtoni gjithë këto, ia kujtoni që është Rekomandim i Këshillit të Evropës që kjo ministre NUK GUXON të flasë si flet e të veprojë si vepron”, ka thënë Kica – Xheli.
Tutje, Kica – Xhelili ka shtuar se “i gjithë ky (ri)kujtim karshi saj do të jetë potencialisht i kotë”.
“Kam provuar. Ia kam thënë të gjitha. Privatisht e publikisht. Sa herë kam bërë thirrje në këto rekomandime, këto standarde e këto shtylla demokratike, ajo i ka kthyer në personale. Ajo, ose ata që i shërbejnë asaj. Kaq pres nga ajo. Kaq pres nga ata”, ka thënë tutje deputetja e LDK-së.
Kujtojmë se Gjykata Kushtetuese e ka rrëzuar Ligjin për Këshillin Prokurorial të Kosovës, ndërsa reagimi i Haxhiut ishte se Gjykata Kushtetuese është duke e sulmuar Kosovën.