Udhëheqësi i Koresë së Veriut, Kim Jong Un, mbikëqyri lëshimin e dy llojeve të raketave të përparuara të mbrojtjes ajrore për të testuar aftësinë e tyre luftarake, njoftoi agjencia shtetërore e lajmeve KCNA.
Testimi i raketave të reja u krye përpara takimit midis presidentëve amerikanë dhe koreano-jugorë, Donald Trump dhe Lee Jae Myung, i cili është planifikuar për nesër, dhe ndërsa janë duke u zhvilluar stërvitjet e përbashkëta ushtarake të dy vendeve, të cilat filluan më 18 gusht.
Më herët këtë muaj, Kim denoncoi stërvitjet ushtarake nga Shtetet e Bashkuara dhe Koreja e Jugut si qëllimin e tyre për të mbetur “shumë armiqësore” ndaj vendit të tij, ndërsa u zotua të përshpejtojë ndërtimin e armëve bërthamore.
Sipas KCNA-së, sistemet e reja të armëve kundërajrore treguan një “përgjigje të shpejtë” ndaj objektivave ajrore, siç janë dronët dhe raketat lundruese.