Kryetari i Drenasit, Ramiz Lladrovci, ka bërë të ditur se komuna e Drenasit ka marrë paditë e para në lidhje me mosekzekutimin e pagave për mësimdhënësit, për të cilën ai ka thënë se fajtore është Ministria e Financave, sepse siç thotë ai ndalesa është bërë nga thesari i kësaj ministrie.
“Sapo u njoftova se filluan paditë e para kundër komunës së Drenasit me rastin e ndalesës së pagave ndaj mësimdhënësve. Edhe pse ndalesa është bërë nga Thesari i Ministrisë së Financave, mirëpo, mësimdhënësit kanë kontrata të lidhura me Komuna, e aq më keq, në rastin konkret, i është ndaluar paga një lehone”, ka shkruar Lladrovci në Facebook.
Ai i ka bërë thirrje Qeverisë së Kosovës që të gjejë një zgjidhje konkrete dhe të ekzekutojë pagat për mësimdhënësit pasi sipas tij në të kundërtën do të ketë dëmtim të buxhetit dhe ngarkim të sistemit gjyqësor.
Ndryshe, të premten, Ministria e Financave, Punës dhe Transfereve ka kërkuar edhe njëherë nga Organizatat Buxhetore që të rikonfirmojnë listat e pagave.
Përmes një postimi në Facebook, Ministria e Financave ka kërkuar nga OB-të që të vendosin nëse do të procedojnë pagat si paradhënie për orët e shtatorit që do të zëvendësohen sipas kalendarit të ri mësimor të miratuar nga MASHTI, në të kundërt, kanë bërë të ditur se do të duhet të veprojnë sipas Ligjit për Greva.