Adea Kondirolli nga organizata “ORCA”, e ftuar në emisionin “FIVE” në RTV Dukagjini për shkarkimin e rektorit të UP-së, Naser Sahiti ka thënë se kjo situatë ka rrjedhur për të shkaktuar një destabilizim të situatës në Universitetin e Prishtinës “Hasan Prishtina”.
Kondirolli ka thënë se rektori Sahiti është shkarkuar pa një arsye të fortë.
“Është e qartë që MAShT-i ka gjetur një aleat dhe kanë arritur t’i bindin antarët tjerë ndoshta dhe jo aq kredibil të Këshillit Drejtues për të shkarkuar rektorin, Naser Sahitin”, ka thënë Kondirolli.
Kondirolli nga “ORCA” ka shtuar se profesori Selim Vezeraj është i denoncuar për plagjiaturë dhe që presin nga Këshilli i Etikës të vërtetojnë gjithçka.
Kondirolli shtoi se gjatë këtyre dy viteve të fundit organizata ORCA ka patur bashkëpunim të mirë me menaxhmentin e UP-së dhe ka pasur përmirësim në avancimet në këtë universitet.
“Në këtë rast jemi të kënaqur nga menaxhmenti i UP-së”, shtoi Kondirolli.
Ndërsa për ushtruesën e detyrës së rektorit të UP-së, Luljeta Plakolli-Kosumi, Kondirolli theksoi se nuk e njohin profesoreshën dhe që presin të dëshmojnë kompetencën e saj si ushtruese e detyrës.