Kryetari i Kuvendit të Kosovës, Glauk Konjufca, është takuar me kongresistin amerikan Ritchie Torres.
Në takimin e tij me ligjvënësin amerikan, kryeparlamentari Konjufca ka diskutuar për bashkëpunimin në mes të Kosovës dhe Shteteve të Bashkuara të Amerikës (ShBA), zhvillimet aktuale politike në vend, si dhe mbështetjen amerikane për proceset euroatlantike të Kosovës.
“Përherë kënaqësi ta takoj Kongresistin dhe mikun e madh të Kosovës e shqiptarëve, z.Ritchie Torres. Gjatë takimit të ngrohtë diskutuam për bashkëpunimin e ngushtë Kosovë – SHBA, zhvillimet politike në shtetin tonë dhe mbështetjen amerikane për proceset euroatlantike të Republikës së Kosovës”, ka shkruar Konjufca.
Torres ka theksuar se ShBA-ja nuk ka mik më të mirë se Kosovën dhe Kosova nuk mund të ketë mik më të mirë në botë se ShBA-në.
“Jam thellësisht mirënjohës për përkrahjen e vazhdueshme të Kongresistit Torres ndaj Republikës së Kosovës dhe përkushtimin e tij në forcimin e miqësisë dhe thellimin e marrëdhënieve dypalëshe me Shtetet e Bashkuara të Amerikës. Thank You Ritchie”, ka vijuar Konjufca.