Qeveria e Kosovës ka miratuar propozim-vendimin e Ministrisë së Punëve të Jashtme për nisjen e procedurës për blerjen e objekteve për ambasadë në Zagreb të Kroacisë dhe Dakar të Senegalit për nevoja të shërbimit të jashtëm të Kosovës.
Ministrja e Punëve të Jashtme, Donika Gërvalla, ka treguar edhe arsyet pse janë zgjedhur këto vende, ndërkaq kryeministri Kurti ka thënë se ky hap do ta fuqizojë diplomacinë e Kosovës.
“Një arsyetim i vogël pse kemi zgjedhur Senegalin, lidhet me disa aspekte teknike. Ne mund të kishim bërë kërkesë edhe për ambasada tjera, mirëpo sipas fjalës popullore, ‘shtrij këmbët sa e ke jorganin’. Buxheti i këtij viti, këtë shumë na e lejonte, prandaj jemi përcaktuar për Kroacinë dhe Senegalin dhe shpresojmë që vitin e ardhshëm do të vazhdojmë me blerjen e objekteve të ndryshme”, ka deklaruar Gërvalla.
Pas fjalës së Gërvallës, kryeministri Albin Kurti e ka hedhur në votim këtë propozim, i cili është miratuar pa asnjë votë kundër apo abstenim.