Kryeministri i Maqedonisë së Veriut, Dimiter Kovaçevski, ka shkruar në rrjetin e tij social Facebook, ku ka thënë se pas miratimit të ribalancimit të Buxhetit të shtetit synohet që të arrihet zhvillimi ekonomik, siç kishte qenë para pandemisë COVID-19.
Sipas Kovaçevskit, nëpërmjet balancimit të buxhetit do të sigurohet stabilitet ekonomik dhe mbështetje më e madhe financiare për qytetarët dhe kompanitë për këtë vit të krizës.
“Në një vit të mbushur me sfida ekonomike, energjetike dhe shëndetësore, vazhdojmë me kujdes të vërtetë për të gjithë qytetarët dhe fokusohemi në zhvillimin e përgjithshëm të shtetit”, shkruan kryeministri Kovaçevski.
“Ribalancimi që u përshëndet nga Banka Botërore dhe u prezantua para qytetarëve dhe komunitetit të biznesit, përveç ruajtjes së stabilitetit makroekonomik, ka për qëllim edhe të ndihmojë ekonominë që të kthehet në nivelin para pandemisë”, ka shtuar ai.
Ai thekson se me ribalancimin janë parashikuar 76 milionë euro për masat e reja kundër krizës, 32 milionë euro për rritjen e prodhimit të ushqimit vendas, rritje të pagave në arsim dhe përkujdesjes për fëmijët dhe pagesën në kohë të tyre, rritje të pensioneve nga shtatori për mbi 320 mijë pensionistë, për subvencione për bujqit dhe fonde për projekte zhvillimore.