Komisioni Qendror i Zgjedhjeve (KQZ) ka vendosur datat dhe aktivitetet për raundin e dytë të zgjedhjeve lokale për Kryetarë të Komunave, të cilat do të zhvillohen nga 3 deri më 9 nëntor 2025.
Sipas vendimit të KQZ-së për miratimin e planit të aktiviteteve, fushata zgjedhore për subjektet politike dhe kandidatët do të fillojë më 3 nëntor dhe do të përfundojë në orën 06:59 më 9 nëntor.
Për votuesit jashtë Kosovës, të regjistruar gjatë raundit të parë dhe që i takojnë komunave ku mbahet raundi i dytë, KQZ ka parashikuar që dërgimi i fletëvotimeve të bëhet nga 26 tetori deri më 29 nëntor. Votimi përmes postës do të fillojë më 27 tetor dhe do të përfundojë më 8 nëntor 2025.
Subjektet politike do të kenë mundësinë të akreditojnë vëzhgues shtesë dhe të konfirmojnë vëzhguesit e akredituar nga 28 tetori deri më 3 nëntor. Edhe mediat, OJQ-të, organizatat ndërkombëtare dhe përfaqësuesit diplomatikë duhet të konfirmojnë vëzhguesit e tyre nga 31 tetori deri më 3 nëntor.
Gjithashtu, në mbledhje u miratuan rekomandimet për përfshirjen e rezultateve të rinumëruara nga 16 kuti votimi në 12 vendvotime të ndryshme, për shkak të evidentimit të mospërputhjeve. Vendvotimet e rinumëruara përfshijnë komunat e Deçanit, Gllogocit, Gjilanit, Lijanit, Prishtinës, Prizrenit, Shtimës dhe Suharekës.
KQZ gjithashtu bëri të ditur se personat që mbushin 18 vjet do të përfshihen në listën e votuesve për raundin e dytë, dhe ata që jetojnë jashtë Kosovës do të duhet të vijnë personalisht për të votuar, ndërsa personat që kanë hequr dorë nga shtetësia e Kosovës do të largohen nga lista e rregullt e votuesve.