Komisioni Qendror i Zgjedhjeve (KQZ), do të mbajë takim nga ora 16:00 këtë të enjte, ku pritet t’i certifikojë rezultatet e zgjedhjeve.
Në rend dite është zëvendësimi i të zgjedhurve që kanë hequr dorë nga pozita e deputetit si dhe certifikimi i rezultateve përfundimtare të zgjedhjeve për Kuvendin e Kosovës, të mbajtura me 9 shkurt.
Ndryshe, të mërkurën Supremja i rrëzoi dy ankesat e fundit që ishte duke i shqyrtuar, duke i hapur kështu rrugë KQZ-së t’i certifikojë rezultatet.
LVV-ja u ankua në Supreme ndaj vendimit të PZAP-it, i cili nuk e kishte pranuar kërkesën e saj për anulimin e votave me postë që ka marrë Lidhja Demokratike e Kosovës (LDK), dhe shkuarjen në rivotim me postë.
Ndërkohë, Prokuroria Themelore në Prishtinë ka nisur hetimet lidhur me procesin e votimit me postë, pas pretendimeve të LVV-së se ka pasur manipulime nga LDK-ja.
Eugen Cakollit nga Instituti Demokratik i Kosovës, ka theksuar se anëtarët e Qeverisë, të cilët kanë fituar mandat deputeti, duhet që sot t’i dorëzojnë dorëheqjet e tyre.