Ministri i Administrimit të Pushtetit Lokal (MAPL), Elbert Krasiqi, në emisionin “FIVE” në RTV Dukagjini, ka diskutuar për betimin e kryetarit të Mitrovicës së Veriut, Erden Atiq, gjatë kësaj të premteje.
“Unë besoj që kryetari Erden Atiq bashkë me nënkryetaren dhe drejtorët e tjerë do të angazhohen në vazhdimësi për të ofruar shërbime në të mirën e të qytetarëve. Unë konsideroj që është hera e parë që kemi një kryetar i cili është i interesuar për mbështetje të qytetarëve”, ka thënë Krasniqi.
Ministri i MAPL-së ka thënë se se zgjedhja e nënkryetares së kësaj komune me nacionalitet serb është sinjal i mirë i kryetarit Atiq që dëshiron të ketë në përbërjen e tij sa më shumë serbë të gatshëm të japin kontributin e tyre për një bashkëjetesë normale në këtë pjesë të vendit.
Krasniqi shtoi se seancat për betimin e kryetarëve të tjerë do t’i koordinojnë.
Kryetari i sapozgjedhur i komunës së Mitrovicës së Veriut, Erden Atiq, ka thënë se do të punojë për të gjithë qytetarët pa dallim.
Ai u ka bërë ftesë qytetarëve që ta vizitojnë komunën e Mitrovicës së Veriut, për ta shtuar bashkëpunimin.
Angazhimi më i madh, sipas tij, do të jetë normalizimi situatës në këtë komunë.
“Jam i kënaqur, sapo e përfunduam seancën solemne të betimit. Me gjithë ekipin shprehi se do të punojmë për të gjithë qytetarët e komunës veriore të Mitrovicës, pa dallim. Angazhimin më të madh do ta bëjmë për ta normalizuar këtë pjesë të komunës, i bëj ftesë gjithë qytetarëve që të vijnë dhe të na takojnë dhe të bashkëpunojmë sa më mirë për të mirën e qytetarëve. Së bashku jam me nënkryetaren Katarina Hagangjiq, do të punojmë me një ekip shpresëdhënëse. Me neve është ministri Elbert Krasniqi, po ashtu është kryesuesi i kuvendit, Nexhat Uglani”, ka thënë ai.