Kryetari i Partisë Demokratike të Kosovës, Memli Krasniqi, në debatin parlamentar ku po diskutohet në lidhje me dialogun Kosovë – Serbi, ka kërkuar nga Qeveria e Kosovës, në veçanti nga kreu i saj, Albin Kurti, të jetë më transparent sa i përket çështjes së dialogut me Serbinë dhe planit evropian.
Krasniqi ka thënë se kjo seancë nuk është thirrur që të akuzohet e sulmohet Qeveria e Kosovës, por, sipas tij, për të diskutuar dhe për të kuptuar më shumë se çfarë mund të përmbajë marrëveshja e mundshme me Serbinë.
Tutje, Krasniqi i ka shtruar Kurtit rreth 12 pyetje në lidhje me planin evropian për normalizimin e marrëdhënieve me Serbinë.
Pyetjet e Krasniqit drejtuar Kurtit ishin:
- Cka është qëllimi i planit evropian? A ofron ky propozim mundësinë e marrëveshjes finale ligjërisht dhe ndërkombëtarisht për palët apo vetëm krijimin e një status-quoe që e zëvendëson këtë të tashmen?
- A është ky propozim i vazhdimësisë së dialogut të deritanishëm apo një pikënisje e re?
- Cila është korniza kohore për arritjen apo mosarritjen e marrëveshjes potenciale?
- A është formati i këtij propozimi një lloj traktati që e njeh si entitete sovrane Kosovën dhe Serbinë?
- Cili është teksti i fundit dhe përmbajtja zyrtare e këtij propozimi. A e keni pranuar dhe sa mendoni që mund të ndryshojë ky plan?
- A e parasheh plani evropian njohjen nga Serbia?
- A e parasheh ky plan se kur do të ndodhë njohja?
- Sa ka arritur qeveria të përfshijë komentet e veta në versionin e fundit të dokumentit?
- A keni garancione që Kosova të njihet nga pesë vendet mos njohëse?
- Cilat do të jenë karrotat nëse marrëveshja arrihet dhe cilat janë shkopinjtë nëse nuk arrihet?
- A u keni kumtuar 6 kushtet tuaja për Asociacionin e Komunave me Shumicë Serbe partnerëve ndërkombëtarë?
- A parashihet vazhdimi i dialogut edhe pas arritjes së marrëveshjes potenciale?
Po ashtu, Krasniqi i ka prezantuar në disa pikat qëndrimet e partisë së tij karshi dialogut:
- Ruajtja e karakterit unitar sipas Kushtetutës së Kosovës
- Njohja formale nga pesë shtetet mosnjohëse
- Nisja e procesit të anëtarësimit të NATOS përmes pjesëmarrjes në partneritet për paqe si hap i parë
- Marrja e statusit të shtetit kandidat për anëtarësim në BE
- Njohja e ndërsjellë në mes të Kosovës dhe Serbisë
Tjera kërkesa të PDK-së të cilat i prezantoi Krasniqi janë:
- Të jetë produkt i realitetit tonë historik dhe politik në raport me Serbinë
- Të jetë në pajtim në aspiratën e integrimit të plotë euroatlantik të Kosovës
- Të jetë në koordinim me aleatin tonë strategjik Amerikën
Kryetari i PDK-së ka kërkuar nga kryeministri Kurti që të jetë më transparent dhe më bashkëpunues me partitë opozitare.
Ai ka thënë se partia e tij është në gjendje ta ndihmojnë Qeverinë me këshilla sa i përket dialogut me Serbinë.