Kryetari i Partisë Demokratike të Kosovës, Memli Krasniqi, ka reaguar sot lidhur me gjykimin e udhëheqësve të Ushtrisë Çlirimtare të Kosovës, të cilët ndodhen në paraburgim në Dhomat e Specializuara prej më shumë se katër vjetësh e gjysmë, ende pa një vendim përfundimtar.
Krasniqi ka kritikuar zvarritjen e procesit dhe shmangien nga standardet e pritura të drejtësisë, duke theksuar se kjo situatë ka nxitur shqetësime serioze, jo vetëm për të drejtat e të akuzuarve, por edhe për besimin e qytetarëve në sistemin e drejtësisë.
Ai ka theksuar se këto shqetësime janë thelluar edhe më shumë pas raportimeve se prova në këtë proces po mbështeten në materiale të fabrikuara nga strukturat shtetërore të Serbisë.
“Partia Demokratike e Kosovës ka qenë dhe do të mbetet gjithmonë në mbështetje të luftës për liri dhe të së drejtës për një proces të drejtë, të paanshëm dhe të shpejtë për çlirimtarët tanë”, shkruan Krasniqi në Facebook.
PDK-ja ka mbështetur protestën e ftuar nga organizatat e dala nga lufta e UÇK-së, duke e cilësuar atë si një shprehje demokratike të qëndrimit qytetar dhe si një shenjë besimi në pafajësinë e të akuzuarve.
Kryetari i PDK-së fton të gjithë qytetarët që besojnë në drejtësinë e luftës për liri dhe në të ardhmen e Republikës së Kosovës, t’i bashkohen protestës që do të mbahet më 7 gusht, në orën 17:00, në sheshin “Skënderbeu”.
“Me çlirimtarët. Për drejtësi. Për Kosovën”, shkruan Krasniqi.
