Kryetari i Partisë Demokratike të Kosovës (PDK), Memli Krasniqi, e ka kritikuar Qeverinë e Kosovës, se nuk po ndërmerr masa për trendin e rritjes së çmimeve, sidomos për produktet esenciale dhe naftës.
Krasniqi, po ashtu, e ka kritikuar pozitën, për iniciativën e një rezolute për rritjen e çmimeve. Ai ka thënë se Qeveria nuk duhet të presë rezoluta nga Kuvendi i Kosovës, sepse siç thotë ai, ajo i ka të gjitha mekanizmat veprues. Problemi kryesor i ekzekutivit, sipas tij, është se po e injoron problemin, dhe me këtë vetëm sa po thellohet kriza.
Kryetari i PDK-së, u shpreh se kryeministri Albin Kurti po fshehet prapa shefes së grupit parlamentar të LVV-së, Mimoza Kusari, e cila edhe e propozoi rezolutën për rritjen e çmimeve.
“Me këtë rezolutë militanti i VV-së nuk mundet ta vlerësojë, i bjen që Mimoza po e mëson Albinin çfarë të bëjë. Albin Kurti po fshehet prapa Mimozës sepse ai e di që qëllimi i rezolutës nuk është i drejtë as i ligjshëm as i duhur, prandaj i duhet një lojë e tillë për ta kamufluar këtë”, ka deklaruar Krasniqi.
Tutje, i pari i PDK-së ka thënë se Qeveria e Kosovës i ka të gjithë numrat e nevojshëm, por siç thotë ai, nuk kanë guxim dhe as dije për ta luftuar inflacionin, dhe se ekonomia e Kosovës është në gjendjen më të rëndë në 23 vjetët e fundit.
Krasniqi ka propozuar që të pezullohet akciza për naftën dhe të reduktohet TVSH-ja për produktet bazë.