Kryetari i Partisë Demokratike të Kosovës, Memli Krasniqi, të enjten e 30 marsit është takuar me ambasadorin e Finlandës në Kosovë, Matti Nissinen.
Në këtë takim është diskutuar për zhvillimet e fundit në Kosovë dhe situatën aktuale politike, pas pranimit të propozimit evropian nga kryeministri Kurti në Bruksel dhe dakordimit për aneksin e zbatimit të tij në Ohër.
“Për ne, kjo marrëveshje, e cila nuk është as finale e as gjithëpërfshirëse dhe që heq dorë nga njohja e ndërsjellë, është e pamjaftueshme dhe mundësi e humbur për të përmbyllur konfliktin e ngrirë prej dekadash me Serbinë. Kjo marrëveshje, mbi të gjitha, është rezultat i gabimeve të vazhdueshme të Kryeministrit Kurti dhe nuk i arrin qëllimet tona shtetërore e qytetare”, shkroi Krasniqi në Facebook.
Ai e ka falënderuar ambasadorin finlandez për vizitën dhe mbështetjen konstante që Finlanda ka dhënë për Republikën e Kosovës.
Nissinen ishte i shoqëruar nga Jeeni Laakso nga Ministria e Punëve të Jashtme të Finlandës dhe Annina Peltonen nga Fondacioni për Paqe “Marti Ahtisaari” (CMI).