Kryetari i Partisë Demokratike të Kosovës (PDK), Memli Krasniqi, ka kritikuar veprimin e Lëvizjes Vetëvendosje (LVV) për të propozuar Hekuran Muratin si kandidat për kryetar të Kuvendit.
Në një deklaratë për media pas dështimit të konstituimit, Krasniqi ka thënë se PDK-ja nuk e ka mbështetur kandidaturën e Muratit, pasi, sipas tij, partia e tij ka qenë e qartë që nuk do të votojë për ministra të qeverisë së kaluar për një pozitë kaq të rëndësishme institucionale.
Sipas tij, Vetëvendosje e ka ditur që Murati nuk do të siguronte votat e nevojshme për t’u zgjedhur, por megjithatë e ka propozuar me qëllim për të vonuar procesin e konstituimit të Kuvendit.
“Janë edhe 35 kandidatë të tjerë që ka VV që po të viheshin në votim, ndoshta sot do të kishim të zgjedhur edhe kryetarin edhe konstituimin e Kuvendit. Nëse dikush ka pasur dyshimin më të vogël që VV-ja ka pasur përpjekje të vërtetë, u bë e qartë se një gjë e tillë u vërtetua.
Vetëm po vijnë në seancë për të humbur kohë dhe për të zvarritur këtë 30-ditësh, për të hyrë në thellim të krizës. Me vetëdije nuk po dëshirojnë të konstituojnë ministrat. Nuk kanë shansë të marrin vota”, ka thënë Krasniqi.