Ministri i Mbrojtjes, Armend Mehaj, bashkë me shefin e Shtabit të Përgjithshëm të Forcave të Armatosura të Republikës së Shqipërisë, Arben Kingji, të martën e 25 tetorit, kanë vizituar Kompleksin Memorial në Prekaz në nderim të komandantit legjendar, Adem Jashari dhe Jasharajve Heroikë.
Kështu ka bërë të ditur ministri Mehaj përmes një postimi në llogarinë e tij në Facebook, ku ka theksuar se “dhimbja, krenaria dhe lavdia e Jasharajve është vlera jonë unike e përbashkët kombëtare”.
“Ishte emocion i veçantë kur së bashku me vëllain, gjeneral Kingjin nderuam sakrificën historike të kombit tonë liridashës, pikërisht në sheshin e lavdisë madhështore të Jasharajve legjendarë. Të lavdishëm gjithmonë komandanti legjendar Adem Jashari, Jasharajt Heroikë dhe gjithë të rënët për Lirinë e Kombit dhe Atdheut”, ka shkruar Mehaj.
Ndryshe, Mehaj në kuadër të vizitës zyrtare në nivel të shefave të mbrojtjes ka pritur në takim shefin e Shtabit të Përgjithshëm të Forcave të Armatosura të Republikës së Shqipërisë, gjeneral Arben Kingjin me delegacionin e tij.
Mehaj ka njoftuar se në këtë takim i ka shprehur falënderimin për mbështetjen vëllazërore gjeneral Kingjit si vend anëtar i NATO-s.
“Ndër të tjera, e ritheksova edhe rëndësinë shumë të madhe për ne që ka mbështetja e ministrisë dhe forcave të Republikës së Shqipërisë, duke pasur parasysh përvojën e madhe në procesin e integrimeve euroatlantike, si dhe në ngritjen dhe zhvillimin e operacionalitetit ushtarak në përgjithësi”, ka shkruar Mehaj.
Ministri i Mbrojtjes ka shtuar se gjeneral Arben Kingji e ka falënderuar për pritjen vëllazërore dhe për emocionet e përshtypjet e veçanta të vizitës me këtë rast.
“Ai na përgëzoi për të gjitha të arriturat e deritashme të Ministrisë së Mbrojtjes, duke konfirmuar angazhimin nga autoriteti dhe ekipi i tij, në mbështetjen e mëtejme për ngritjen e aftësive dhe kapaciteteve operacionale të FSK-së”, ka shtuar Mehaj.
Mehaj ka theksuar se me gjeneral Arben Kingji kanë konfirmuar angazhimin dhe përkushtimin maksimal për të realizuar objektivat ndërshtetërore në planin ushtarak edhe në të ardhmen.