Kryetari i Partisë Demokratike të Kosovës (PDK), Memli Krasniqi, përmes një postimi në rrjetin social Facebook ka kujtuar Komandantin e Brigadës 113 të Zonës Operative të Drenicës, Mujë Krasniqi dhe 41 bashkëluftëtarët e tij të cilët 24 vjet më parë kanë rënë heroikisht në brezin kufitar në Gorozhup të Pashtrikut.
“Sot kujtojmë Komandantin e Brigadës 113 të Zonës Operative të Drenicës, Mujë Krasniqi, dhe 41 bashkëluftëtarët të tij, të cilët si sot, 24 vite më parë ranë heroikisht në brezin kufitar shqiptaro-shqiptar, në Gorozhup të Pashtrikut”, ka shkruas Krasniqi.
Ai ka theksuar se sakrifika e këtij komandanti do të mbetet përherë në mbamendjen e popullit të Kosovës.
“Sakrifica emblematike e Komandant Kapuçit, i cili përkundër plagëve të pashëruara në trup, bashkë me bashkëluftëtarë priu në frontin e luftës, do të mbetet përherë në mbamendjen historike të popullit të Kosovës, në luftën tonë shekullore për liri e pavarësi”, ka theksuar Krasniqi në postimin e tij.
Ndër të tjera, Krasniqi ka shtuar se do të nderohen përjetësisht të gjithë heronjët e Ushtrisë Çlirimtare të Kosovës (UÇK).
“Lavdi e përjetshme për jetën dhe veprën e të gjithë heronjve të Ushtrisë Çlirimtare të Kosovës!”, ka përfunduar Krasniqi.
Ndryshe, 24 vjet më parë, mëngjesin e 14 dhjetorit të vitit 1998, luftëtarët e UÇK-së, derisa sillnin armë në Kosovë, kishin rënë në pritën e organizuar nga ushtria dhe policia e armikut, në vendin e quajtur “Te Likenet e Hasit”, në Gorozhup të Pashtrikut. Të mërkurën e 14 dhjetorit, bëhen 24 vjet nga rënia heroike e komandantit të Brigadës 113 të Zonës Operative të Drenicës, Mujë Krasniqi – Kapuçi.
Në luftimet e zhvilluara në borën e dhjetorit, veç dëshmorëve të rënë, u plagosën edhe dhjetëra luftëtarë.
24 vjet nga rënia e Mujë Krasniqit dhe bashkëluftëtarëve të tij