Mandatari për krijimin e Qeverisë së re, Albin Kurti, gjatë fjalës së tij në seancën për krijimin e qeverisë së re ka numëruar pesë vendimet e para të tij në rast se merr besimin e deputetëve edhe për një mandat tjetër.
Kurti deklaroi se miratimi i buxhetit është vendimi i parë që do të marrë, njofton Dukagjini.
“Miratimi i projektligjit të buxhetit 2026, vendimi për caktimin e pensionit minimal në vlerë prej 150 euro që prek 200 mijë pensionist, vendimi për rritjen e shtesave për fëmijë me 50 për qind, vendimi për rritjen e pagës minimale në 500 euro dhe miratimi i ndryshmit të plotësimit të ligjit që mundëson heqjen e kufizimit të punësimit në sektorin privat për veteranët”, tha Kurti.
Tutje, Kurti numëroi edhe punët që kanë bërë gjatë këtij mandati.
“Katër vitet e fundit kemi ndërtuar me krejt çka kemi ditur e mundur kemi pasur rritjen ekonomike më të lartë në rajon me rritje mesatare mbi 6 për qind. Sfidën e inflacionit kemi ditur ta menaxhojmë dhe kemi shtuar punësimin dhe kemi rritur edhe të ardhurat e familjeve. Kemi bërë shumë punë të mira por kemi edhe shumë të tjera që na presim. Kemi liberalizuar vizat në zonat shengen. Kemi përmirësuar imazhin e vendit”.
Kurti teksa u kërkoi votën deputetëve u shpreh se është në dorën e tyre që t’ia mundësojnë qeverisjen e mirë.
“Është në dorën tuaj që ta na mundësoni qeverisjen e mirë. Ne jemi vendi më demokratik në rajon. Institucionet tona janë të ndërtuara mbi vullnetin qytetar dhe ky standard duhet të ruhet. Roli i Kuvendit duhet të forcohet në mbikëqyrjen e Qeverisë”, deklaroi Kurti.