Kryeministri i Kosovës, Albin Kurti, me rastin e 17 vjetorit të themelimit të Lëvizjes Vetëvendosje, teksa ka përmendur të arriturat e partisë, ka thënë se me qeverisjen e LVV-së, gjatë vitit 2022 kanë filluar ndryshimet që sipas tij e bëjnë ndarjen me të kaluarën.
Ai, në një konferencë për media, ka theksuar se në një vit qeverisje, LVV “ka dëshmuar se ka qeverisje alternative tjetër prej asaj që është parë në të kaluarën”.
“Ky 17 vjetor i LVV-së, për herë të dytë na gjen në qeverisje, edhe 16 vjetorin e patëm festuar në qeverisje, pra gati një vit e tre muaj duke lëvizur gjërat për të mirë e përpara në Republikën tonë. Ishte një vit me kriza të shumfishta që prekën gjithë njerëzimin e nuk na kursyen as neve por me angazhim e punë, me dije e plane kemi arritur të bëjmë më të mirën”.
I pari i qeverisë, ka thënë se me qeverisjen e tyre është menaxhuar suksesshëm pandemia COVID-19.
“Kemi menaxhaur suksesshem me pandeminë, më shkallën më të lartë të vaksnimit në rajon dhe me shkallën më të ulët të vdekshmërisë, kemi dyfishuar rritjen ekonomike, kemi shtyrë reformën në drejtësi, kemi luftuar krimin dhe korrupsionin, kemi avancuar aleanca dhe partneritetin me shtetet mike, kemi shërbyer e mbrojtur si asnjë qeverisje e mëparshme”, ka thënë Kurti.
Po ashtu, Kurti ka treguar se tashmë ka filluar procesi i zgjedhjeve të brendshme të partisë të cilën e drejton ai.
Sipas tij, gratë, rinia dhe mërgata janë kategoritë që “iu paraprijnë ndryshimeve në vend”.
“Zgjedhjet kanë filluar tashmë dhe inkurajoj që të gjithë që të marrin pjesë në to e të japin më të mirën e tyre. Gratë, rinia dhe mërgata janë kategori që iu prijnë ndryshimeve në vend, andaj në këto zgjedhje për herë ta parë do ta kemi organin e rinisë së VV-së dhe atë të gruas për VV-në. Kurse për mërgatën kemi lehtësuar procesin zgjedhor, më shumë hapësirë e më shumë përfaqësim”.
Sipas tij, transformimet e mëdha progreset e hovshme i bëjnë pikërisht këto tri kategori shoqërore.