Kryeministri i Kosovës, Albin Kurti, e ka përshëndetur votimin dhe ratifikimin në Kuvend të tri marrëveshjeve që kanë derivuar nga Procesi i Berlinit.
Kurti tha se Kosova është vendi i dytë që ratifikon tri marrëveshjet nga Procesi i Berlinit.
Ndërkaq, sipas tij “me 2/3 e votave bëhet shteti i parë në Ballkanin Perëndimor që i ratifikon ato në Kuvend”.
“Falënderues për mbështetjen e secilit deputet dhe secilës deputete. Bashkë, sot, dëshmuam se Republika jonë është për bashkëpunim të mirë rajonal dhe për progres dhe ecje të shpejtë në jetësimin e Tregut të Përbashkët Rajonal”, ka thënë ai.
Kurti, tutje, ka folur për benefitet që i merr Kosova nga ratifikimi i këtyre marrëveshjeve.
“Shtetet e Ballkanit Perëndimor së bashku përbëjnë një treg me rreth 18 milionë banorë. Marrëveshjet që ratifikuam sot për lëvizjen e lirë me letërnjoftime, njohjen e ndërsjellë të diplomave të arsimit të lartë dhe njohjen e ndërsjellë të profesioneve të mjekut, stomatologut dhe arkitektit në të gjashtë vendet e Ballkanit Perëndimor, do të rrisin mobilitetin e studentëve, punëtorëve dhe bizneseve do të sjellin përfitime për të gjithë”, ka shkruar Kurti.
Kurti në fund ka thënë se shpreson që edhe vendet e tjera nënshkruese ta ndjekin ritmin e njëjtë “ashtu që të mirat për qytetarët tanë të fillojnë sa më parë”.