Kryeministri i Kosovës, Albin Kurti, e ka pranuar kërkesën e ministrit për Komunitete dhe Kthim, Nenad Rashiq, që Patriarkut Porfirije të Kishës Ortodokse Serbe, t’i lejohet hyrja në Kosovë.
Kështu është bërë e ditur në një njoftim për media ku thuhet se Patriarku Porfirije ka paralajmëruar vizitë në Kosovë në kuadër të përgatitjeve për festën e Krishtlindjes Ortodokse.
“Sot në mesditë, Ministri për Kthim dhe Komunitete, z. Nenad Rashiq, kërkoi nga Kryeministri i Republikës së Kosovës, Albin Kurti, që t’i lejohet Patriarkut të Kishës Ortodokse Serbe që të hyjë në Kosovë, në kuadër të përgatitjeve për festën e Krishtlindjes Ortodokse”, thuhet në njoftim.
“Patriarku Porfirije ka paralajmëruar që sot pasdite do të vijë te vendkalimi kufitar ndërmjet Kosovës dhe Serbisë dhe se dëshiron të hyjë pa truprojet e tij, edhe pse nuk ka bёrё kёrkesё pёr vizitё sipas dispozitave tё marrëveshjes ekzistuese. Ministrit Rashiq, Kryeministri Kurti iu përgjigj pozitivisht”, vijon njoftimi.
Paralajmёrimi i Patriarkut Porfirije se planifikon tё hyjё pa truproje nё Kosovё është edhe një dëshmi e radhës se Kosova është vend më i sigurt se Serbia, theksohet në njoftimin e zyrës së kryeministrit.
MPJD: Kërkesa për vizitë e Patriarkut Porfirije s’është refuzuar