Kryeministri i Kosovës, Albin Kurti, në mbledhjen e Qeverisë ka thënë se në dy vjet qeverisje kanë dëshmuar vullnetin për të luftuar krimin dhe korrupsionin.
Ai ka njoftuar për themelimin e strukturës për hartimin e strategjisë kundër korrupsionit.
“Po e themelojmë strukturën për hartimin e strategjisë kundër korrupsionit. Në këto gati 2 vite të qeverisjes kemi dëshmuar dukshëm vullnetin për të luftuar krimin dhe korrupsionin dhe për reforma për drejtësi e në administratën publike”, u shpreh ai.
Sipas Kurtit, Ligji për Këshillin Prokurorial që parasheh reformën e sistemit të drejtësisë, ligji për zyrtarët publikë dhe ligji për Byronë e pasurisë së Pajustifikueshme janë disa prej atyre ligjeve që janë dërguar në Gjykatën Kushtetuese nga opozita.
“Madje Ligji për Këshillin Prokurorial ka më shumë se 6 muaj që është në trajtim. Në historinë 15-vjeçare të Pavarësisë nuk mbahet mend që kaq shumë ligje të jenë kontestuar brenda një kohe kaq të shkurtër. Kontestimi i tyre është një përpjekje dëshpëruese për paralizim të reformave dhe kundërshtim i hapur i nevojës shoqërore, kërkesës qytetare dhe vullnetit demokratik të 14 shkurtit 2021”, shtoi Kurti.
Megjithatë, krahas këtyre, kreu i ekzekutivit ka theksuar se përkushtimi i tyre do të mbetet po i njëjti.