Në Obiliq, të premten, është bërë zbulimi i shtatores së Heroit të Kombit, Fahri Fazliu, veprimtarit të dalluar të çështjes kombëtare.
Kryeministri i Kosovës, Albin Kurti, ka përshëndetur ngritjen e shtatores së këtij dëshmori të kombit.
Siç njofton Zyra e Kryeministrit, Kurti tha se për jetën dhe aktivitetin politik dhe patriotik të Fahriut, do të rrëfejnë kujtime me peshë historike vetë shokët e tij që e njohën e bashkëvepruan me të.
“Në radhë të parë, dua të them që kanë qenë pikërisht vetëdija e kulluar politike për liri, tradita e mospajtimit me Serbinë okupatore, si dhe përpjekja e pandalur dhe lufta e vazhdueshme për çlirim, të cilat e kanë karakterizuar veprimtarinë e Fahri Fazliut dhe shokëve të tij, ato ideale që në fund e kanë çliruar Kosovën më 1999 dhe e kanë mundësuar shtetin e pavarur të Kosovës më 2008. Kërkesa ‘Kosova Republikë’, e thirrur nga Fahriu dhe mijëra të tjerë gjatë demonstratave të vitit 1981, nga një parullë popullore dominante e kohës, tani është realitet politik me Republikën e Kosovës”, ka thënë Kurti.
Tutje, ai ka thënë se fryma patriotike dhe përkushtimi në aktivizëm, të shoqëruara nga përgatitja teorike dhe konsistenca në vlerat e Rilindjes Kombëtare Shqiptare, si një lëvizje nacionale emancipuese, në mënyrat siç janë të ndërthurura në mendim dhe veprim te Fahriu e te shokët e tij, janë platformë për ide dhe burim frymëzimi për secilin që i hyn rrugës së aktivizmit politik për Kosovën dhe çështjen kombëtare shqiptare.
“Ardhmëria jonë politike është e matshme me nivelin e besnikërisë ndaj rrugës së dëshmorëve dhe me trajtat e vazhdimësisë dhe qëndrueshmërisë që tregojmë në këtë rrugëtim. Kushdo që e ka njohur veprimtarinë e Fahriut, e di që ajo është e pashqitshme nga ajo e Afrim Zhitisë, bashkë me të cilin luftoi edhe në ditën e rënies së tyre të përbashkët më 2 nëntor 1989”, ka vijuar ai.
Ndër të tjera, ai ka theksuar se sa e pastër dhe e lartë ishte veprimtaria patriotike e Fahri Fazliut dhe Afrim Zhitisë, mund të kuptohet edhe nga trashëgimia e drejtpërdrejtë e tyre politike.
“Ata që i pasuan Fahriun dhe Afrimin në rrugën e tyre, Bahri Fazliu dhe Agron Rrahmani, Ilir Konushevci dhe deri te Zahir Pajaziti, janë disa nga profilet e luftëtarëve më të paepur për lirinë e Kosovës. Fahri Fazliu tashmë i derdhur në bronz nga artisti skulptor Sabri Behramaj, përjetësohet në sheshin e qytetarëve dhe popullit, për të cilët, punoi e luftoi deri në frymën e fundit. Nga sot, kjo shtatore do të jetë një vepër arti kujtese për Fahri Fazliun dhe gjithë çfarë ka përfaqësuar ai bashkë me shokët e tij”.