“Forcat policore të Serbisë i vranë ata, vetëm pse ishin shqiptarë…Republika e Kosovës nuk mund të falë e as të harrojë”.
Kështu ka shkruar kryeministri i Republikës së Kosovës, Albin Kurti, gjersa ka përkujtuar martirët e masakrës së Bukoshit.
Me anë të një postimi në Facebook, Kurti ka rithënë se Serbia duhet mbajtur përgjegjëse për krimet e luftës në Kosovë, teksa ka theksuar se kryerësit e këtyre veprave duhet të nxirren para drejtësisë.
“Më 3 maj 1999, oborri i shkollës në Bukosh u mbulua me gjak. 25 burra dhe djem të rinj shqiptarë u pushkatuan. Forcat policore të Serbisë i vranë ata, vetëm pse ishin shqiptarë. I ekzekutuan pasi i ndanë nga kolona e banorëve të fshatrave të Suharekës, që i kishin dëbuar nga shtëpitë e tyre. Dëbimi, vrasja dhe zhdukja me forcë e shqiptarëve ishte pjesë e projektit gjenocidal të Serbisë për shfarosjen e shqiptarëve, ‘Patkoi’. Kriminelët e luftës duhet nxjerrë para drejtësisë. Serbia duhet mbajtur përgjegjëse për krimet e luftës, krimet kundër njerëzimit dhe veprimet gjenocidale të kryera në Kosovë. Në përvjetorin e 24-të, përkujtojmë martirët e masakrës së Bukoshit. Lavdi!”, ka shkruar Kurti.
Më 3 maj 1999, forcat serbe kishin vrarë 25 burra të fshatit Bukosh.