Kryeministri i Kosovës, Albin Kurti, ka përkujtuar njëvjetorin e strehimit të refugjatëve afganë në Kosovë.
Përmes një postimi në rrjetin social Twitter, Kurti ka thënë se Kosova i ka strehuar një 1 mijë e 798 refugjatë afganë, të cilët kishin ikur nga pushteti taleban i Afganistanit.
On this day one year ago, we welcomed the very first group of Afghan citizens who had left their home amidst chaos and uncertainty. Since then, Kosova has provided shelter to 1.798 afghans. We are partners to our allies and an ally to those who need a helping hand. https://t.co/Y5G7t6z1I5
— Albin Kurti (@albinkurti) August 29, 2022
“Në këtë ditë të një viti më parë, ne mirëpritëm grupin e parë të qytetarëve afganë që ishin larguar nga shtëpia e tyre në mes të kaosit dhe pasigurisë. Që atëherë, Kosova ka siguruar strehim për 1798 afganë. Ne jemi partnerë të aleatëve tanë dhe aleat të atyre që kanë nevojë për një dorë ndihmëse”, ka shkruar Kurti.
Më 16 gusht të vitit 2021, shteti i Kosovës e kishte pranuar kërkesën e Shteteve të Bashkuara të Amerikës (ShBA), për ta strehuar një numër të caktuar të afganëve, të cilët ishin të detyruar ta lëshonin venin e tyre.
Ndërkaq, Departamenti Amerikan i Shtetit (DASH), kishte bërë të ditur se disa afganëve të strehuar përkohësisht në Kosovë u është refuzuar hyrja në Shtetet e Bashkuara të Amerikës si shkak i moskalimit të procesit të verifikimit.
Afganët të cilëve u është refuzuar hyrja për në SHBA pritet t’iu mundësohet ky udhëtim brenda një viti. Në të kundërt, ata do të zhvendosen në një shtet të tretë.