Kryeministri i Kosovës, Albin Kurti, ka pritur në takim në zyrën e tij ambasadorin e Francës në Kosovë, Olivier Guerot.
Kurti dhe ambasadori francez kanë diskutuar për zhvillimet aktuale, që përfshijnë mbarëvajtjen e deritanishme të procesit të konvertimit të targave ilegale dhe të regjistrimit të veturave me targa RKS dhe procesi që parashihet me udhëzimin administrativ për zgjedhje të parakohshme në katër komunat në veri të vendit.
Në njoftimin e Zyrës së Kryeministrit bëhet e ditur se gjatë bisedës u trajtuan edhe temat në fushën e arsimit e të teknologjisë së informacionit bazuar në përvojat e shtetit francez, si dhe për mundësitë që ofron Kosova dhe planet në zbatim të Qeverisë në sektorin e energjisë, përkatësisht në atë të burimeve të ripërtëritshme të energjisë.