Përfaqësuesi Special i Bashkimit Evropian për Dialogun Prishtinë-Beograd, Miroslav Lajçak, nga e hëna e 27 qershorit deri më 29 qershor do të qëndrojë për vizitë në Kosovë.
Kjo është bërë e ditur përmes një njoftimi për media nga Zyra e BE-së në Prishtinë.
“Përfaqësuesi Special i Bashkimit Evropian për Dialogun Beograd-Prishtinë dhe çështjeve të tjera rajonale të Ballkanit Perëndimor, Miroslav Lajçak, do të vizitojë Kosovën nga 27 deri më 29 qershor”, thuhet në njoftimin për media.
Në njoftim është bërë e ditur se emisari i BE-së gjatë vizitës në Kosovë, do të takohet me Albin Kurti dhe liderët e partive kryesore opozitare.
“Gjatë vizitës së tij Lajçak do të takohet me kryeministrin Albin Kurti, si dhe me liderë të partive kryesore opozitare dhe përfaqësues të bashkësisë ndërkombëtare në Kosovë”, thuhet mes të tjerash në njoftim.
Gjithashtu, Lajçak planifikon të vizitojë edhe Prizrenin dhe veriun e Kosovës.
Ndër të tjera në njoftim thuhet se “Fjalimi për media i emisarit Lajçak është planifikuar për të mërkurën e 29 qershorit. Detajet do të ndahen me përfaqësuesit e mediave të martën e 28-qershorit”.