I dërguari i posaçëm i Bashkimit Evropian për dialogun Kosovë-Serbi, Miroslav Lajçak, bashkë me të dërguarin amerikan për Ballkanin Perëndimor, Gabriel Escobar, në kuadër të vizitës së tyre në Beograd janë takuar me presidentin e Serbisë, Aleksandër Vuçiq.
Lajçak, me anë të një postimi në Twitter, ka thënë se patën diskutime të gjata për gjendjen e serbëve në Kosovë.
Ai konsideron se dhuna nuk është e pranueshme dhe nevojitet një zgjidhje urgjente politike për të dalë nga kriza aktuale.
“Në Beograd, Gabriel Escobar dhe unë patëm diskutime të gjata me Aleksandar Vuçiq për gjendjen komplekse të serbëve në Kosovë. Dhuna nuk është kurrë e pranueshme dhe nevojitet urgjentisht një zgjidhje politike për krizën aktuale. Ne e vlerësuam gatishmërinë e tij për të kontribuuar në të”, ka shkruar Lajçak.
In Belgrade, 🇺🇸 DAS Escobar and I had long discussions with @predsednikrs @avucic about the complex situation of the Serbs in Kosovo. Violence is never acceptable and a political solution to the current crisis is urgently needed. We appreciated his readiness to contribute to it. pic.twitter.com/jlj0lw2xAd
— Miroslav Lajčák (@MiroslavLajcak) June 7, 2023
Dyshja i kanë dhënë ultimatum kryeministrit Albin Kurti që më së largu deri të mërkurën duhet të japë përgjigje nëse e pranon zgjidhjen e propozuar nga ShBA-ja dhe BE-ja për depërshkallëzimin e situatës në veri.
Escobar ka thënë për gazetarët në pasditen e së martës se Washingtoni qëndron me popullin e Kosovës, por ka shtuar se nuk mbështet një individ që “nuk ka instinkt bashkëpunimi” – duke aluduar te kryeministri i Kosovës, Albin Kurti.
“Ne po e shohim që po merren vendime, pavarësisht partneritetit tonë, dhe ky është sinjal për ne – ne nuk mund ta pranojmë këtë gjë. Prandaj, në një pikë, kur të duam ta rikthejmë koordinimin dhe partneritetin me këtë Qeveri, ne jemi të gatshëm, sepse ne gjithmonë do të jemi me popullin e Kosovës. Kjo nuk nënkupton që duhet ta mbështesim një individ që nuk e ka atë instinkt të bashkëpunimit dhe koordinimit”, ka thënë Escobar.
Ndërsa, Lajçak ka theksuar nevojën e gjetjes së një zgjidhjeje politike që mundëson përshkallëzimin e menjëhershëm dhe kthimin në normalitet.
“Sot në mëngjes me presidenten e Kosovës, Vjosa Osmani, kemi diskutuar për situatën në veri të Kosovës. Ne theksuam rëndësinë e gjetjes së një zgjidhjeje politike që mundëson depërshkallëzimin e menjëhershëm dhe kthimin në normalitet”, ka shkruar Lajçak.
Të njëjtën kërkesë e pati edhe ambasadori amerikan në Kosovë, Jeff Hovenier.