I dërguari special i Bashkimit Evropian për dialogun Kosovë-Serbi, Miroslav Lajçak, ka treguar çfarë kanë diskutuar në takimin që e kanë mbajtur të martën në Prishtinë me kryeministrin e Kosovës, Albin Kurti.
Përmes një postimi në Twitter, Lajçak ka theksuar nevojën për zbatimin e planit trepikësh të propozuar nga Bashkimi Evropian.
“Përsërita shqetësimet lidhur me situatën në veri të Kosovës, nevojën për deeskalim urgjent, zgjedhje të reja dhe kthimin në dialog. E vlerësova shkëmbimin e thelluar mbi hapat konkretë”, ka theksuar Lajçak.
Had a long, frank and open discussion with PM @albinkurti. Reiterated 🇪🇺 concerns regarding the situation in north Kosovo, the need for urgent de-escalation, new elections and return to the Dialogue. I appreciated the in-depth exchange on concrete steps. pic.twitter.com/z1DMAjY9du
— Miroslav Lajčák (@MiroslavLajcak) July 4, 2023
Ndërkaq, tensionet në veri nisën në fund të majit, kur kryetarët e rinj shqiptarë të Zveçanit, Leposaviqit dhe Zubin Potokut – nën asistimin e policisë – hynë në ndërtesat komunale, pavarësisht kundërshtimit të serbëve lokalë.
Bashkësia ndërkombëtare ka kërkuar nga Kosova dhe Serbia që t’i ulin tensionet dhe të organizohen zgjedhje të reja në katër komunat në veri.