Lidhja Demokratike e Kosovës (LDK) ka deklaruar të enjten se për tri vjet qeverisje, partia në pushtet e ka shkelur katër herë Kushtetutën e vendit.
Sipas tyre, këto shkelje tregojnë më së miri për mospërkushtimin e kësaj qeverie për shtetin e së drejtës.
“Për tre vjet qeverisje, partia në pushtet ka shkelur 4 herë Kushtetutën, derisa janë edhe disa ligje që janë në pritje të vendimit nga Gjykata Kushtetuese. Këto shkelje tregojnë më së miri mospërkushtimin e kësaj qeverie për shtetin e së drejtës”, thuhet në postimin e LDK-së në faqen e tyre zyrtare në Facebook.
Sipas LDK-së, shkelja e parë e kësaj qeverie ishte kur, sipas tyre, ministrja e Arsimit, Arbërie Nagavci, kishte ndërhyrë në kompetencat e komunës së Kamenicës për reformën në arsim.
Pas kësaj, sipas LDK-së, Ligji për Këshillin Prokurorial, i cili u hartua nga ministrja e Drejtësisë, Albulena Haxhiu, paraqet shkeljen e dytë kushtetuese, ndërsa një tjetër, sipas tyre, është pezullimi i vendimeve të komunës së Prishtinës.
Gjersa në fund, sipas LDK-së, shkelja e katërt që Qeveria Kurti e ka bërë është shkarkimi i tetë anëtarëve të bordit të RTK-së.