Ish-kryeministri i Kosovës, tashmë deputet i Lidhjes Demokratike të Kosovës (LDK), Avdullah Hoti bashkë me dEputetin e kësaj partie, Driton Selmanaj dhe anëtarët e degës së LDK-së në Gjakovë kanë vizituar urën mbi Drinin e Bardhë në Rogovë të Hasit.
Hoti ka thënë se kjo urë është dëmtuar nga reshjet në janar 2021 dhe se sipas tij nuk është ndërmarrë asnjë veprim për të deri më sot.
“Para se të jetë vonë edhe një herë bëj thirrje të trajtohet me prioritet ky rast. Është e pakuptueshme bllokada e projekteve kapitale në gjithë Kosovën: autostrada për Gjilan, rruga për Podujevë, rruga për Mitrovicë, rruga për Gjakovë, rruga Xërxë-Rahovec e shumë projekte të tjera”, ka shkruar Hoti.
Deputeti i LDK-së ka thënë tutje se dëmet për qytetarë dhe për ekonominë nga vonesa në këto projekte të mëdha janë së paku tri herë më të mëdha se kostoja e këtyre projekteve.
“Tanimë është e qartë se kjo qeveri nuk i ka prioritet këto projekte dhe nuk do t’i kryejë në mandatin e mbetur prej një viti e gjysmë. Kjo shihet edhe nga raporti i buxhetit për periudhën janar-mars 2023, ku pothuajse të gjitha projektet kapitale janë me shpenzime zero”, ka shtuar Hoti.
Hoti tutje ka theksuar se kjo qeveri ka bllokuar edhe shumë projekte të komunave duke mos ua bartuar mjetet vetanake.